Тамрини аввалини “Алфайсалӣ” дар Душанбе

Душанбе, 22.02.2016 (АМИТ «Ховар»). Клуби футболи “Алфайсалӣ”-и Урдун шоми дирӯз аввалин тамрини худро дар варзишгоҳи шаҳри Душанбе баргузор кард. Тавре мухлисони футбол иттилоъ доранд, барои баргузор кардани аввалин бозӣ дар гурӯҳи “Б” -и Ҷоми Конфедератсияи футболи Осиё бо чемпиони чоркаратаи Тоҷикистон “Истиқлол”-и Душанбе клуби футболи “Алфайсалӣ”-и Урдун ба Тоҷикистон омадааст ва рӯзи 23-феврал соати 16 дар варзишгоҳи марказии пойтахт бо ҳам қувва меозмоянд.
Имрӯз дар толори меҳмонхонаи “Dushanbe Hyatt regency” нишасти матбуотӣ бо ҳузури мураббиён ва бозигарони дастаҳои ширкаткунанда баргузор мешавад.
Ёдрас мешавем, ки аз 23-феврал мусобиқаи футболбозони кишварҳои Осиё барои Ҷоми чемпионҳо ва Ҷоми КФО дар гурӯҳҳо шурӯъ мешавад. “Истиқлол”-и Душанбе бо клубҳои “Алфайсалӣ”, “Нафит Алвасат”-и Ироқ ва “Триполӣ клаб”-и Лубнон дар як гурӯҳ барои ба бозиҳои минбаъда баромадан рақобат мекунад.