Тавзеҳи лоиҳаи тағйиру иловаҳо ба Конститутсия дар шаҳру навоҳии Суғд

Душанбе, 18.02.2015. (АМИТ «Ховар»).-Бо мақсади таблиғу ташвиқи ҳадафҳои Паёми Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон ва тавзеҳи лоиҳаи тағйиру иловаҳо ба Конститутсияи Ҷумҳурии Тоҷикистон дар шаҳру навоҳии вилояти Суғд аз ҷониби гурӯҳи тарғиботӣ аз ҳисоби олимону коршиносон ва масъулини мақомоти иҷроияи ҳокимияти давлатии вилояти Суғд вохӯриҳо идома доранд.
Чунин вохӯриҳо дар шаҳрҳои Қайроққум, Чкалов, ноҳияҳои Ашт ва Айнӣ бо фарогирии вакилони Маҷлиси вакилони халқи шаҳриву ноҳиявӣ, кормандони соҳаҳои гуногуни хоҷагии халқ, аз қабили омӯзгорон, табибон, фаъолони маҳал, аъзои Шӯрои ҷамъиятӣ, собиқадорони меҳнат ва дигар қишрҳои ҷомеа баргузор гардид.
Аъзои гурӯҳи тарғиботӣ роҷеъ ба муҳтавои Паёми Президенти Ҷумҳурии Тоҷикистон ва зарурати тағйиру иловаҳо ба Конститутсияи Ҷумҳурии Тоҷикистон сухан ронда, зикр карданд, ки мувофиқи пешниҳодот зиёда аз 40 тағйиру илова ба Конститутсияи (Сарқонуни) Ҷумҳурии Тоҷикистон ворид гардида, қарор аст, ки 22 майи соли равон раъйпурсии умумихалқӣ оид ба ворид намудани тағйиру иловаҳо ба Конститутсияи (Сарқонуни) Ҷумҳурии Тоҷикистон баргузор гардад.
Ёдовар мешавем, ки баргузории чунин силсиламулоқот бо ҷалби дигар қишрҳои ҷомеа дар вилоят бо маром ҷараён дорад.