Тоҷикони шаҳри Твери Федератсияи Русия мактаб месозанд

Душанбе, 17.02.2016 (АМИТ «Ховар»).- Тибқи иттилои Худоназар Нурҳаётов, мудири шуъбаи маориф ва илми ноҳияи Рӯшон тоҷикони шаҳри Твери Федератсияи Русия мактаби нави замонавиро дар ҷойи мактаби бар асари заминларза валангоршудаи № 35 иборат аз 5 синфхона бо маблағи 420 ҳазор сомонӣ сохта, онро бо таҷҳизоти нави замонавӣ таъмин хоҳанд намуд.
Бо ин мақсад қарори раиси ноҳияи Рӯшон «Дар бораи таҷдиди бинои таълимии муассисаи таҳсилоти миёнаи умумии №35-и деҳаи Рухчи ҷамоати Савноб ба тасвиб расида, аз ҷониби шуъбаи маориф ва илми ноҳия ҳуҷҷатҳои лозимӣ барои сохтмони мактаб омода шуда, ба раёсати сохтмони асосии Вазорати маориф ва илми Ҷумҳурии Тоҷикистон ирсол гардидаанд. Бо фарорасии фасли баҳор сохтмони мактаб оғоз шуда, бо саршавии соли нави таҳсили 2016 хонандагони мактаби деҳаи Рухч дар муассисаи наву барҳаво таҳсилашонро идома хоҳанд дод.