Ҳалокати се нафар дар садамаи нақлиётӣ

Душанбе, 07.03.2016 (АМИТ «Ховар»). 5-уми март ронандаи мошини тамғаи «Опел-Зефир», сокини 22-солаи ш. Душанбе ҳангоми ҳаракат аз шаҳри Душанбе ба самти шаҳри Қурғонтеппа, дар ҳудуди ҷамоати деҳоти Фахрободи ноҳияи Хуросон бехатарии ҳаракат дар роҳро таъмин карда натавониста, ба мошини тамғаи «Опел-Вектра», таҳти идораи ронанда, сокини 27-солаи ноҳияи Ҷ.Рӯмӣ бархӯрдааст.
Дар натиҷа, мусофири мошини «Опел-Зефира» сокини 23-солаи шаҳри Душанбе ва мусофири мошини тамғаи «Опел-Вектра» зани 21-солаи ноҳияи Хуросон ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидаанд. Дигар мусофирони мошинҳои мазкур: ду ҷавони 21-солаи ш. Душанбе, марди 27-солаи ноҳияи Ҷ.Рӯмӣ ва сокини 22-солаи ноҳияи Ҷ. Румӣ ҷароҳатҳои гуногуни ҷисмонӣ бардошта, дар беморхона бистарӣ шудаанд. Пас аз чанд муддат сокини 22-солаи ноҳияи Ҷ. Румӣ дар беморхона ба ҳалокат расидааст.