Ҳамкории соҳибкорзанони Суғду Хатлон

Душанбе, 01.03.2016 (АМИТ «Ховар»),- Як гурӯҳ занони соҳибкори бахшҳои кишоварзӣ, ҳунармандӣ, тиб ва дигар соҳаҳои фаъолияти соҳибкорӣ, бо мақсади мубодилаи таҷриба, шиносоӣ бо технологияи пешрафта ва густариш бахшидани ҳамкории дуҷониба аз вилояти Хатлон ба вилояти Суғд сафари корӣ анҷом доданд. Дар ин бора дирӯз аз Хадамоти матбуоти раиси вилояти Суғд хабар доданд.
Ёдовар мешавем, ки ин панҷумин чорабинии сафарии омӯзишӣ оид ба мубодилаи таҷриба дар доираи лоиҳаи “Соҳибкории занон воситаи васеъ намудани ҳуқуқ ва имкониятҳои занон”, ки аз ҷониби Ассотсиатсияи миллии занҳои соҳибкори Тоҷикистон (АМЗСТ) дар доираи лоиҳаи USAID дар вилояти Хатлон татбиқ гардида истодааст, мебошад.
Рӯзи аввали сафари корӣ занон аз маркази таълимии ба номи З. Баҳриддинова, коргоҳи дӯзандагии «Ганҷи ҳунар», растаи фурӯши маҳсулоти дастии маркази савдои “Баҳор” боздид намуданд. Инчунин бо фаъолияти кошонаи ҳусн, маркази “Табибони шафқат” аз наздик шинос шуданд.
Дар рӯзи дуюм занҳои кишоварз аз фаъолияти гармхона дар ҷамоати Деҳмой, маркази ташхисии “Нурафзо”, маркази таълимӣ- истеҳсолии “Дугонаҳо”, мағозаи “Дунёи атлас” дидан намуда, сипас аз фаъолияти Маркази занон “Гулрухсор” дидан намуданд.