Асп бо лақаби «Варс» ба соҳибаш шоҳҷоиза овард

Душанбе, 24.03.2016 (АМИТ «Ховар»).- Аспи Беҳзод Файзуллоев, раҳбари ширкати мобилии «Вавилон», дар пойгаҳи аспдавонӣ, ки 23 март, дар шаҳри Душанбе, дар Муассисаи давлатии «Наврӯзгоҳи пойтахт”, ба муносибати Иди байналмилалии «Наврӯз” баргузор шуд, соҳиби шоҳҷоиза гардид.
Аспи ӯ бо лақаби «Варс» дар ин пойгаҳ ҷои аввалро гирифт. Масофаи умумии пойгаҳи ниҳоӣ 2200 метр ва шоҳҷоиза аспи сафеди зоти тоҷикӣ буд.
Ғолиби пойгаҳ аспи «Варс”, мутааллиқ ба Беҳзод Файзуллоев, 9 сол дошта, бори дувум аст, ки дар пойгаҳи аспдавонӣ пирӯз ва соҳиби шоҳҷоиза мешавад. Ин асп дар пойгаҳи соли 2013 низ барои соҳибаш шоҳҷоиза оварда буд.
Ин пойгаҳмиёни 80 асп аз Душанбе ва ноҳияҳои мухталифи Тоҷикистон, аз ҷумла Файзобод, Нуробод, Рӯдакӣ, Ховалинг, Балҷувон ва ғайра баргузор гардид.
Ҳамчунин бар пояи қазовати доварони пойгаҳ, аспи лақабаш «Рахш”, марбут ба Ҳоҷӣ Исмоил Пирмуҳаммадзода, аз рӯҳониёни маъруфи Тоҷикистон, дар ин пойгаҳ ҷойи дуюмро гирифт.
Баргузории пойгаҳи аспдавонӣ дар «Наврӯзгоҳ” дар ҳолест, ки рӯзи гузашта дар ҳамин майдон мусобиқаи гуштии наврӯзӣ барпо гардид, ки шоҳҷоизаи ин мусобиқаро Муҳаммадмурод Абдураҳмонов, паҳлавони маъруфи тоҷик, ба даст овард. Ӯ дар вазни беш аз 100 кило дар марҳилаи ниҳоии мусобиқа ҳарифаш Неъматулло Асронқуловро аз ноҳияи Рӯдакӣ дар муддати 15 сония мағлуб карда ва шоҳҷоиза – мошини сабукрави тамғаи «Хундай»-ро азони худ намуд.
Ин 23-юмин мошини сабукрав аст, ки паҳлавони тоҷик Муҳаммадмурод Абдураҳмонов барои ғолибияташ дар мусобиқаҳои гуштӣ дар кишвар ба даст меорад.
Ба ин тартиб, имрӯз савумин рӯзи таҷлили расмии иди Наврӯз дар Тоҷикистон аст. 24 март ба ҳайси рӯзи гул ва ниҳолшинонӣ эълон шудааст.