Баҳодиҳии хавфҳои марбут ба хизматрасониҳои дастраси молиявӣ

Душанбе, 23.03.2015. (АМИТ «Ховар»). — Семинарии омӯзишӣ таҳти унвони «Баҳодиҳии хавфҳои марбут ба хизматрасониҳои дастраси молиявӣ” барои намояндагони мақомоти назоратии кишвар, иштирокчиёни бозори молиявӣ, аз ҷумла масъулини бонкҳои тиҷоратӣ, ташкилотҳои амонатии қарзии хурд ва Ассотсиатсияи бонкҳои Тоҷикистон бо иштироки муовини якуми раиси Бонки миллии Тоҷикистон Ҷамолиддин Нуралиев ва мутахассиси калони Бонки ҷаҳонӣ оид ба бахши молиявӣ Клаудио Стролиго баргузор гардид.
Ҷамолиддин Нуралиев изҳор дошт, ки чорабинӣ ба “Баҳодиҳии хавфи қонунигардонии (расмикунонии) маблағҳо ва маблағгузории терроризм, вусъат додани дастрасӣ ба хизматрасонӣ ва маҳсулотҳои молиявӣ”, ки бо ташаббуси Бонки ҷаҳонӣ дар доираи кумаки техникӣ, баргузор гардидааст, бахшида шудааст.
Номбурда изҳори умедворӣ намуд, ки семинари мазкур барои тақвияти ҳамкориҳои муштарак байни мақомоти давлатӣ ва намояндагони бахши хусусӣ бо мақсади муттаҳид намудани кӯшишҳо дар самти баланд бардоштани сатҳи дастрасии аҳолӣ ба хизматрасониҳои молиявӣ ва амалҳои муштарак дар ҷодаи идораи самараноки хавфҳои марбут ба қонунигардонии (расмикунонии) даромадҳо ва маблағгузории терроризм мусоидат хоҳад кард.
Мутахассисони Бонки ҷаҳонӣ оид ба бахши молиявӣ, сохтор, хусусият ва функсияҳои “Фишанги баҳодиҳии хавфҳо дар сатҳи миллӣ оид ба васеъ намудани дастрасӣ ба хизматрасониҳои молиявӣ”-ро ки аз ҷониби Бонки ҷаҳони таҳия шудааст, бо тарзу усули соддаю фаҳмо пешниҳод намуданд.
Зимни мулоқот ва мубодилаи афкори озод иштирокдорони семинар изҳор доштанд, ки гузаронидани баҳодиҳии хавфҳои молиявии дастрас дар сатҳи миллӣ имкон медиҳад, ки на танҳо хавфҳои марбут ба дастрасии хизматрасониҳои молиявӣ дар Тоҷикистон ошкор гарданд, балки ҳамчунин ба рушд ва таҳияи маҳсулотҳои нави дастраси бозори молиявӣ мусоидат намояд.