Белгия ба мавқеи ДИ зарбаҳои ҳавоӣ хоҳад зад

Душанбе, 25.03.2016. (АМИТ «Ховар»). — Белгия тасмимашро барои задани зарбаҳои ҳавоӣ ба гурӯҳи террористии ба ном «Давлати исломӣ» дар ҳайати эътилофи байналмилалӣ таҳти роҳбарии ИМА тасдиқ мекунад, — эълом дошт сарвазири ин кишвар Шарл Мишел. Дар ин бора РИА Новости хабар медиҳад.

«Шумо ҳамчунин медонед, ки дар доираи созишнома бо Ҳолланд, мо вазифаи ҳавопаймоҳои  F16-ҳамонро аз сар гирифта, дар парлумон ва ҳукумат ба муҳокима мегузорем, то ки имконпазир будани тавсеаи ваколати  F16-ҳоро ҳал намоем», — гуфт Шарл Мишел зимни нишасти матбуотии муштарак бо Котиби давлатии ИМА Ҷон Керри.

Ба гуфтаи ӯ, бояд донист, ки Белгия дар якҷоягӣ бо ИМА дар доираи эътилофи байналмилалӣ, ки бо ДИ мубориза мебарад, чӣ нақши муфид мебозад.

Дар навбати худ Ҷон Керри изҳор дошт, ки ИМА бо Белгия ҳамкории қавиро идома дода, дар нобудсозии ДИ ба муваффақият ноил шуда истодаанд.

Аввали моҳи март ВАО хабар доданд, ки Вашингтон оид ба иштироки ҳавопаймоҳои қувваҳои ҳарбӣ-ҳавоии Шоҳигарӣ дар амалиёти ҳарбӣ-ҳавоӣ дар Сурия расман ба Белгия муроҷиат кардааст. Қаблан хавопаймоҳои Белгия дар амалиёти эътилофи байналмилалӣ дар Ироқ иштирок доштанд.