«Бо ту мефахрам диёрам»-мусобиқаи варзишӣ

Душанбе, 15.03.2016. (АМИТ «Ховар»).-Дар Донишкадаи политехникии Донишгоҳи техникии Тоҷикистон дар шаҳри Хуҷанд ба пешрафти соҳаи варзиш диққати ҳамаҷониба дода мешавад. Исботи гуфтаҳо он аст, ки дастаи баскетболбозони донишкада соли гузашта дар спартакиадаи ҷумҳуриявӣ байни муассисаҳои олӣ сазовори ҷойи сеюм гардид.
Дастаи футболбозони донишкада ҳамасола дар мусобиқаи футбол байни донишҷӯёни муассисаҳои таҳсилоти касбии олӣ мақоми аввалро соҳиб мешавад.
Як соҳаи дигари варзиш, ки донишҷӯёни донишкада ба он майли бештар доранд, ин риштаи варзишии карате-до мебошад. Дар чемпионати Осиёи Марказӣ, ки дар шаҳри Тошканд дар риштаи варзишии карате-до доир шуд, донишҷӯёни донишкада Мӯҳсинҷон Раҳматов ва Сӯҳробҷон Юсупов ширкат варзида, Мӯҳсинҷон дар вазни 55 килограмм бар ҳамаи рақибони худ аз Ҷумҳуриҳои Узбекистон, Туркманистон, Қазоқистон ва Қирғизистон дастболо гардида, сазовори медали тиллои мусобиқа гардид ва унвони чемпиони Осиёи Марказиро ба даст овард. Сӯҳробҷон Юсупов дар вазни 67 килограмм ба даври нимниҳоӣ баромада, сазовори медали биринҷӣ гардид. Дар мусобиқаи даставӣ Сӯҳробҷон сазовори медали нуқра гардид.
Дар доираи Соли фарди солим Раёсати донишкада тасмим гирифтааст, ки ба хотири рушди соҳаи варзиш як майдончаи варзишии ҷавобгӯ ба талаботи муосирро ба истифода дода, ҳамзамон толори варзишии факултети муҳандисӣ-иқтисодиро таъмиру навсозӣ намояд.
Чанд моҳ инҷониб миёни устодон ва донишҷӯёни донишкада тамринҳо ба хотири саломатӣ ҷараён доранд. Устодон меъёрҳои варзиширо таҳти унвони «Бо ту мефахрам диёрам» супориданд. Онҳо дар давидан, сангбардорӣ, турниккашӣ, ҷаҳидан ва дигар намудҳо ҳунару малакаи худро нишон доданд.