Душанбе: 4 рӯзи таҷлили бошукӯҳи Иди байналмилалии Наврӯз

Душанбе, 15.03.2016 (АМИТ «Ховар»).- Тибқи қарори раиси шаҳри Душанбе Маҳмадсаид Убайдуллоев ва нақшаи чорабиниҳои Мақомоти иҷроияи маҳаллии ҳокимияти давлатӣ дар шаҳри Душанбе таҷлили бошукӯҳи Иди байналмилалии Наврӯз дар шаҳри Душанбе 21 март тавассути «Корвони наврӯзӣ» аз маҳаллаҳои «Бадахшон»-и ноҳияи Шоҳмансур, «Кӯҳдоман»-и ноҳияи Исмоили Сомонӣ, «Лучоб»-и ноҳияи Сино, шаҳраки 23-и ноҳияи Фирдавсӣ ва намоиши театришуда дар Муассисаи давлатии «Наврӯзгоҳи пойтахт» оғоз мегардад. Рӯзи дигар, 22 март дар Муасисаи давлатии «Боғи пойтахт» наврӯзии аҳли маорифи шаҳри Душанбе бо сайругашти оммавии наврӯзӣ дар тамоми боғҳои фарҳангиву фароғатии шаҳри Душанбе бо ташкили барномаҳои консертии идона ва мусобиқаи гӯштини миллӣ дар Наврӯзгоҳи пойтахт барпо мегардад. 23 март чорабинии идонаи наврӯзии ноҳияҳои шаҳри Душанбе дар Боғи устод Рӯдакӣ, майдони «800-солагии Маскав», боғҳои фарҳангу фароғатии «Кӯли ҷавонон», «Дӯстии халқҳо» ва мусобиқаи пойгаи аспдавонӣ дар Наврӯзгоҳи пойтахт ва 24 марти соли 2016 чорабиниҳо барои тақвияти тадбирҳои сабзкорӣ, ободониву созандагӣ ва ниҳолшинонӣ дар маҳаллаву шаҳрак, атрофи биноҳои истиқоматӣ, идора, муассиса ва корхонаҳои истеҳсолию соҳибкорӣ гузаронида мешаванд.