Фотимӣ: «Тоҷикистон шарики асосии кишвари мо дар минтақа аст»

Душанбе, 18.03.2016.(АМИТ «Ховар»).-Дурнамои тавсеаи равобити мутақобилан судманди Тоҷикистон ва Покистон дар меҳвари мулоқоти Шукурҷон Зуҳуров, Раиси Маҷлиси намояндагони Маҷлиси Олии Ҷумҳурии Тоҷикистон ва Ториқ Фотимӣ -ёвари Сарвазири Покистон дар Исломобод қарор гирифт.
Шукурҷон Зуҳуров изҳор дошт, ки густариши муносиботи шарикӣ ва ҳамкории гуногунҷанбаи ду кишвари осиёӣ дар таҳкими равобити сиёсию иқтисодӣ ва амнияти минтақа аз самтҳои афзалиятноки сиёсати хориҷии Ҷумҳурии Тоҷикистон мебошад. Таъкид гардид, ки бо мақсади густариши равобити тиҷоратию иқтисодӣ ва тақвияти ҳамкории минтақавӣ ҷониби Покистон аз дархости кишвари мо барои пайвастан ба Созишномаи чорҷониба оид ба ҳамлу нақли транзитӣ байни Чин, Қазоқистон, Қирғизистон ва Покистон ҷонибдорӣ намуд.
Дар мулоқот ҳамзамон масоили марбут ба таҳкими ҳамкории судманди ду кишвар дар бахшҳои иқтисодию тиҷорат, энергетика, коммуникатсия, саноат, ҳамкории илмию фарҳангӣ, амниятӣ ва дигар масоили мавриди таваҷҷуҳи тарафайн матраҳ гардиданд.
Ториқ Фотимӣ- ёвари Сарвазири Покистон аз сатҳи муносиботи ҳасанаи Душанбе ва Исломобод дар заминаҳои мухталиф изҳори қаноатмандӣ намуд. Фотимӣ таъкид кард, ки Покистон иқдомоти Ҷумҳурии Тоҷикистонро дар тамоми нишастҳои сатҳи минтақавӣ ва байналмилалӣ ҷонибдорӣ намуда, Тоҷикистонро шарики асосии худ дар минтақа мешуморад.
Мусоҳибон ҳамзамон доир ба масоили марбут ба амнияти минтақа ва ҷаҳон, хусусан вазъи Афғонистон, мубориза бар зидди терроризму ифротгароӣ, қочоқи маводи мухаддир ва дигар зуҳуроти манфури замони муосир табодули назар карданд.