«Корвони китоб» ба Ванҷ расид

Ванҷ, 28.03.2016. (АМИТ «Ховар»).- Дар марказии ноҳияи Ванҷ «Корвони китоб»-ро сокинони сершумори ноҳия ботантана истиқбол гирифтанд. Имсол ин корвонро ҳамчунин як гурӯҳ аъзои кумитаи иҷроияи марказии Ҳаракати ваҳдати миллӣ ва эҳёи Тоҷикистон ҳамроҳӣ мекунанд. Зикр шуд, ки ҳадафи ҳарду гурӯҳ як аст- боло бурдани сатҳи худогоҳии миллӣ ва ҷовидон нигоҳ доштани ваҳдати миллӣ тавассути асарҳои бузурги адибони гузаштаву имрӯзаи тоҷик. Агар миллат донову таҳсилкарда бошад, ба арзишҳои миллӣ дар ҳама ҳолат пойбанд мемонад ва ба доми фиреб кашидани он ғайриимкон аст.
Бо ибтикори Корхонаи воҳиди давлатии таъмин ва савдои китоби назди Вазорати фарҳанги ҷумҳурӣ дар маркази ноҳия китобҳои тозанашри шоирон ва нависандагони тоҷик ба намоиш ва фурӯш гузошта шуданд. Хамчунин корхонаи мазкур асарҳои зиёди адабию илмиро ба бахши фарҳанги ноҳия тақдим намуд.
Сафари «Корвони китоб» ба шаҳру ноҳияҳои дигари вилоят идома дорад.