Лигаи чемпионҳои Осиё: Дастаҳои футболи Эрон дар куҷо бозӣ мекунанд: Тоҷикистон ё Узбекистон?

Душанбе, 3.03.2016 (АМИТ «Ховар»).- Тибқи қарори Конфедератсияи футболи Осиё бозиҳои дастаҳои Эрон бо Арабистони Саудӣ дар Лигаи чемпионҳои Осиё дар кишвари савум, дар майдони футболи кишвари бетараф баргузор хоҳанд шуд.
Бо дархости Федератсияи футболи Арабистони Саудӣ, дар мавриди муташанниҷ шудани вазъи сиёсии Эрон ва Арабистони Саудӣ пас аз ҳамлаҳои рӯзи 2-юми январ ба сафорат ва консулгариаш дар Теҳрон ва Машҳад, робитаашро бо Ҷумҳурии исломии Эрон қатъ кардааст.
Кумитаи мусобиқоти Конфедератсияи футболи Осиё дар робита ба ин тасмим гирифта буд, ки агар равобити Арабистони Саудӣ ва Эрон то рӯзи 15-уми март ба ҳолати пештара барнагардад, мусобиқоти дастаҳои ин ду кишвар дар Лигаи қаҳрамонҳои Осиё дар кишвари савум доир мешавад. Ба гуфти КФО “Ҳукумати Арабистони Саудӣ сафари шаҳрвандони худро ба Ҷумҳурии Исломии Эрон манъ кардааст ва ин ҳолат то рӯзи гузашта роҳи ҳалли худро пайдо накард ва Конфедератсияи Футболи Осиё чунин қарор мекунад, ки бозиҳо дар кишвари сеюм баргузор шаванд”.
Дар ҳамин ҳол масъулини футболи Эрон баргузор шудани бозиҳои Лигаи чемпионҳоро бо ширкати дастаҳои кишварашон дар мамлакатҳои Қатар, Уммон, АМА ва Лубнон рад кардаанд ва эҳтимол меравад, ки ду кишвар — Тоҷикистон ва Узбекистон мизбони намояндагони клубҳои Эрон бо Арабистони Саудӣ шаванд.
То кунун роҳбарияти се клуби иштирокдори Лигаи чемпионҳо — «Тракторсозӣ», Сипоҳон» ва «Зуб Оҳан » ҳанӯз ҳеҷ вокунише ба ин қарори Конфедератсияи футболи Осиё нишон надодаанд. Аммо ба навиштаи хабаргузории «Форс», ба назар мерасад, ки Тоҷикистон ва Узбекистон эҳтимолан ҳамчун мизбони тимҳои эронӣ дар рақобат бо дастаҳои Арабистони Саудӣ пазируфта шаванд.