Маҳфили шеъри Муъмин Қаноатро Ҷӯрабек ва Афзалшо нуру зиё мебахшанд

Душанбе, 15.03.2016.(АМИТ «Ховар»).-Ба муносибати ҷашни ҷаҳонии Наврӯз 17 марти соли равон соати 14:00 дар толори Филармонияи давлатии Тоҷикистон ба номи Акашариф Ҷӯраев маҳфили шеъри Шоири халқии Тоҷикистон Муъмин Қаноат баргузор мегардад. Интизор меравад, ки маҳфили шеъри шоири шинохтаи тоҷик Муъмин Қаноатро овозхонҳои шинохтаи кишвар Ҷӯрабек Назрӣ ва Афзалшо Шодӣ бо суруду таронаҳои дилошӯб шукӯҳи тоза бахшанд.
Назар ба иттилои Ато Мирхоҷа, муовини аввали раиси Иттифоқи нависандагони Тоҷикистон чунин маҳфилҳои адабии шоирони тоҷик дар арафаи ҷашни ҳуҷастапайи Наврӯз дар доираи баргузории Ҳамоиши байналмилалии адибони кишварҳои ҳавзаи Наврӯз, ки дар рӯзҳои таҷлили ин ҷашни фархунда дар Душанбе доир мегардад, гузаронида мешаванд. Ба иттилои Ато Мирхоҷа дар Ҳамоиши байналмилалии адибони кишварҳои ҳавзаи Наврӯз намояндагони беш аз 20 кишвари ҷаҳон иштирок хоҳанд кард.