“Регар ТадАЗ”- барандаи Ҷоми ФФТ

Душанбе,12.03.2016 (АМИТ «Ховар»).-Клуби футболи “Регар ТадАЗ” маротибаи дуввум соҳиби Ҷоми ФФТ гардид. Дирӯз дар бозии ниҳоии ниҳоят душвор футболбозони шаҳри Турсунзода “Хуҷанд”-ро бо натиҷаи 1 бар 0 мағлуб намуда, баранда шуданд. Ягона голро дар дақиқаи 25-ум бозингари нави даста Ромиш Ҷалилов ба ҳадаф расонд. Агар ба бозиҳои пешинаи “Регар ТадАЗ” таваҷҷуҳ кунем, пас Ромиш Ҷалилов дар вохӯрӣ бо “Хайр” низ бо ягона голи задааш футболбозони шаҳри Турсунзодаро ба бозиҳои нимниҳоӣ раҳнамун сохта буд.
Дар вохӯрӣ барои мақоми сеюм “Вахш”-и Қурғонтеппа бар КМВА “Помир” бо ҳисоби 1 бар 0 пирӯз шуд. Муҳофизатгари даста Холмурод Назаров ба кумаки ҳамлагарон омада, дар дақиқаи 73-юм голи ғолибиятро ба дарвоза зад.
Баъди ҷамъбасти бозии ниҳоӣ роҳбарияти Кумитаи ҷавонон, варзиш ва сайёҳии назди Ҳукумати Тоҷикистон ва ФФТ медалҳо ва Ҷомро ба соҳибонашон тақдим карданд. Бозингари беҳтарини бозии ниҳоӣ Ромиш Ҷалилов эълон шуд ва бо туҳфаи хотиравӣ қадрдонӣ гардид.
Ёдовар мешавем, ки мусобиқа барои Ҷоми ФФТ аз соли 2012 гузаронида шуда, бозиҳои ниҳоӣ бо чунин натиҷа анҷом ёфтаанд:
2012 — “Регар-ТадАЗ” (Турсунзода) — “Хайр” (Ваҳдат) — 1:0
2013 — “Хайр” (Ваҳдат) — КМВА “Помир” (Душанбе) — 1:1. Аз пеналти — 6:5
2014 — “Истиқлол” (Душанбе) — “Хайр” (Ваҳдат) — 2:0
2015 — “Истиқлол” (Душанбе) — “Хайр” (Ваҳдат) — 5:1
2016 — “Регар-ТадАЗ” (Турсунзода) — “Хуҷанд” (Хуҷанд) — 1:0