Саидҷалол Саидов дар Ҷоми Африқо ҳафтум шуд

Душанбе, 16.03.2016. (АМИТ «Ховар»).-Дар шаҳри Касабланкаи Марокаш мусобиқоти Ҷоми Африко оид ба дзюдо баргузор гардид. Дар он паҳлавони тоҷик Саидҷалол Саидов мақоми ҳафтумро ишғол кард. Ӯ дар рақобатҳо дар вазни зери 100 килограмм, ки ҳамагӣ 21 гӯштингир ширкат дошт, дар даври аввал озод буд. Дар даври дуюм бар рақибаш Филипп Авитиалкараз (Бритониёи Кабир) пирӯз шуд. Вале баъдан Саидҷалол аз Доменико Ди Гуидаи итолиёвӣ шикаст хӯрд. Сипас паҳлавони тоҷик қувваозмоиро ба Луис Боуякоуб (Алҷазоир) бохт ва дар натиҷа дар ҷойи ҳафтум қарор гирифт. Дар ин чорабинии варзишӣ 251 гӯштингир аз 47 кишвар ширкат дошт. Тоҷикистонро танҳо Саидҷалол Саидов намояндагӣ кард. Дар ҳисоби умумидастаӣ тими мунтахаби Фаронса бо касби 1 медали тилло, 4 нуқра ва 4 биринҷӣ дар ҷойи аввал қарор гирифт. Дастаи мунтахаби Испания (1-1-2) дуюм ва тими Алҷазоир (1-1-2) сеюм шуданд.
Ёдовар мешавем, ки Саидҷалол Саидов моҳи ноябри соли гузашта дар мусобиқаи бози Ҷоми Африқо дар шаҳри Порт-Луиси Маврикий барандаи медали биринҷӣ гардида буд. Ӯ дар рақобатҳо дар вазни зери 100 кило баъди ду пирӯзӣ бар рақибонаш аз Словения ва Сенегал ба даври нимниҳоӣ роҳ ёфт. Вале Саидҷалол аз Патрик Мосери суисӣ шикаст хӯрд. Баъдан паҳлавони тоҷик барои ҷойи севум Стефан Ҷурисичи сербиягиро мағлуб кард ва бо медали биринҷӣ сарфароз гашт.
Саидҷалол Саидов барои дарёфти роҳхат ба Бозиҳои олимпии соли 2016 дар Рио-де-Жанейрои Бразилия мубориза мебарад.