Шуғнон: Бунёди мактаби нав барои 500 хонанда

Шуғнон, 14.03.2015. (АМИТ»Ховар»).-Бинои мактаби миёнаи ба номи генерал Мастибек Тошмуҳаммадов, воқеъ дар ҷамоати Поршинев дар аввали солҳои шастум бунёд шудааст ва бо мурури замон бар асари барфу борон ва зилзила деворҳояш кафида, ба ҳолати садамавӣ рӯ ба рӯ шудааст. Ба иллати нарасидани синфхонҳои таълимӣ ва ба шароити муосир ҷавобгӯ набудани шароити таҳсил Вазорати маориф ва илми ҷумҳурӣ тасмим гирифт барои хонандагони ин деҳа бинои дутабақаи замонавӣ бунёд кунад. Тирамоҳи соли гузашта сохтмони таълимгоҳ бо маблағгузории Бонки рушди исломӣ оғоз шуд ва қарор аст, ки дар остонаи ҷашни 25-солагии истиқлол мавриди баҳрабардорӣ қарор гирад.
Сардори ҷамъияти масъулияташ маҳдуди «Муродалӣ» Раҷаб Насриддинов баён дошт, ки ин бино аз 19 синфхона, 11 утоқи фаннӣ, толори варзиш, устохона, утоқи дӯзандагӣ ва китобхона иборат буда, дар он наздики 500 хонанда ба таҳсил фаро гирифта мешаванд. Алъон дар ин сохтмон 74 бинокор аз шаҳру навоҳии кишвар кор мекунанд ва масъулин ният доранд дар арафаи рӯзи истилолият онро ба истифода диҳанд.