Тағйирот ба Созишномаи байни Тоҷикистону Қазоқистон дар масъалаи меҳнат

Душанбе, 30.03.2016.(АМИТ «Ховар»).- Парлумони Тоҷикистон Протокол оид ба ворид намудани тағйирот ба Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Қазоқистон дар бораи фаъолияти меҳнатӣ ва ҳифзи ҳуқуқҳои муҳоҷирони меҳнатӣ-шаҳрвандони Ҷумҳурии Тоҷикистонро, ки муваққатан дар ҳудуди Ҷумҳурии Қазоқистон кор мекунанд, дар бораи фаъолияти меҳнатӣ ва ҳифзи ҳуқуқҳои муҳоҷирони меҳнатӣ -шаҳрвандони Ҷумҳурии Қазоқистон, ки муваққатан дар ҳудуди Ҷумҳурии Тоҷикистон кор мекунанд, аз 4 майи соли 2006 тасдиқ намуд.
Нурулло Маҳмадуллозода, муовини вазири меҳнат, муҳоҷират ва шуғли аҳолии кишвар дар назди вакилон гуфт, ки санади мазкур бо мақсади тақвияти корҳо дар танзими масъалаҳои муҳоҷирати меҳнатӣ бо Ҷумҳурии Қазоқистон таҳия шудааст. Он асосан ворид намудани се тағйироти усулиро ба меъёрҳои созишнома байни ду кишвар дар самти муҳоҷират пешбинӣ менамояд. Аз ҷумла, тибқи Пртоколи мазкур бо назардошти тағйирёбии мақомоти ваколатдори тарафҳо оид ба татбиқи Созишномаи зикршуда, ба моддаи 4- и он тағйирот ворид карда шуда, аз ҷониби Тоҷикистон Вазорати меҳнат, муҳоҷират ва шуғли аҳолии кишварамон ва аз ҷониби Қазоқистон Вазорати тандурустӣ ва рушди иҷтимоӣ ва Вазорати корҳои дохилии ин кишвар муайян карда мешавад. Инчунин ба моддаи 4 и Созишнома сархати нав илова карда мешавад, ки тибқи он мақомоти ваколатдори тарафҳо ҳуқуқ пайдо менамоянд, то мубодилаи маълумотро оид ба шумора ва ҳайати касбии муҳоҷирони меҳнатӣ ба амал бароранд. Ҳамзамон пас аз иҷро гардидани расмиёти дохилидавлатии санади мазкур мақомоти ваколатдори тарафҳо таъйин гардида, минбаъд ҳангоми тағйир ёфтани мақомот фавран дар ин бора якдигарро бо роҳҳои дипломатӣ хабардор менамоянд.