Таҷлили ҷашни Наврӯз дар Истанбул

Душанбе, 28.03.2016 (АМИТ «Ховар»).- Бо ибтикори Консулгарии генералии Ҷумҳурии Тоҷикистон дар шаҳри Истанбул Иди Наврӯзи хуҷастапай бо шукӯҳи хосса дар ҳалқаи ҳамватанон ва донишҷӯёни тоҷик дар шаҳри Истанбул ҷашн гарифта шуд.
Дар барномаи наврӯзӣ зиёда аз 150 ҳамватан ва донишҷӯёни тоҷик аз ш.Истанбул ва дигар ноҳияҳои атрофи вилояти Истанбул иштирок намуданд.
Дар ҷашни наврӯзӣ дастурхони идонаи ҳафтсину ҳафтшин бо суманак ва дигар хӯрокҳои миллӣ ороста шуда, таҳти садои суруду мусиқии халқӣ, мероси бойи аҷдодонамон, намунаи ҳунарҳои мардумӣ, асарҳои косибӣ, либосҳои миллӣ, китобҳо оид ба фарҳанги мардуми Тоҷикистон ва маводи таблиғотӣ доир ба муаррифии симои мусбати кишварамон ба манзури иштирокдорон пешкаш гардид.
Дар барномаи наврӯзӣ Консули генералии Ҷумҳурии Тоҷикистон дар ш.Истанбул Илҳом Абдураҳмонов ҳамватанон ва донишҷӯёни тоҷикро ба муносибати Иди байналмилалии Наврӯз ва самимона табрик карда, ҳозиринро ба таҳкими дӯстӣ, поксозии қалбҳо ва ваҳдату ягонагӣ даъват намуд.
Дар барномаи идона инчунин меҳмонон ва донишҷӯёни тоҷик сухан гуфта, ҳозиринро бо фарорасии Иди байналмиллалии Наврӯзи Аҷам табрик намуданд. Дар фарҷоми барномаи наврӯзӣ ба ҳамватанон ва меҳмонон зиёфати идона бо таомҳои миллии тоҷикӣ пешкаш шуд.