Тарбияи фарзанди солим, некиродаву солеҳ ва ватандӯст вазифаи муқаддаси модар аст

Душанбе, 9.03.2016 (АМИТ «Ховар»). -Дар Вазорати меҳнат, муҳоҷират ва шуғли аҳолии Ҷумҳурии Тоҷикистн ҷамъомади тантанавӣ бо иштироки роҳбарияти вазорат, кормандони дастгоҳи марказӣ ва кормандони Агентии меҳнат ва шуғли аҳолӣ бахшида ба Рӯзи Модар баргузор гардид.
Дар он монологи «Модар» дар иҷрои ҳунарпешаи халқии Ҷумҳурии Тоҷикистон Савринисо Қурбонова, саҳначаи «Модар» аз ҷониби ҳурнармандони театри Лоҳутӣ ва суруди «Модар» аз тарафи ҳунарпешаи шоистаи Ҷумҳурии Тоҷикистон Муҳаррама Шарипова иҷро гардид.
Муовини якуми вазири меҳнат, муҳоҷират ва шуғли аҳолии Ҷумҳурии Тоҷикистон Сангинзода Эмин Нӯъмон зикр намуд, ки аз қадим тарбияи фарзанди солим, некиродаву солеҳ ва ватандӯст дар таърихи халқи тоҷик яке аз вазифаҳои муқаддаси оила ва ҷамъият ба шумор рафта, ба ин масъала ҳам дар тамаддуни ориёӣ, ҳам дар фарҳанги исломӣ ва ҳам дар адабиёти оламшумули мо таваҷҷуҳи бисёр ҷиддӣ зоҳир шудааст. Имрӯз ҷоемаи Тоҷикистон дар симои зан на танҳо модар, хоҳар ва ҳамсар, балки сиёсатмадори шинохта, донишманди асил, сарвари муваффақ, соҳибкори саховатпеша, табиби ҳозиқ, корманди поквиҷдони мақомоти ҳифзи ҳуқуқ, мураббии наслҳо ва ҳамшираи меҳрубонро мебинад, ки ин мояи ифтихори ҳар як фарди ҷомеа мебошад.
Вазири меҳнат, муҳоҷират ва шуғли аҳолии Ҷумҳурии Тоҷикистон Тағойзода Сумангул Саид аҳли толорро ба эҳтироми занон дар ҷомеаи муосир, аёдати модарон ва занони собиқадор даъват намуд.