Ғалабаҳои душвори “Барселона” ва “Бавария”

Душанбе, 6.04.2016 /АМИТ «Ховар»/. Дирӯз дар дидорҳои аввали ¼ -ниҳоии Ҷоми чемпионҳои Аврупо клуби футболи Барселона дар варзишгоҳи “Камп Ноу” бо душворӣ дастаи “Атлетико”-ро бо натиҷаи 2 бар 1 мағлуб кард.

Агар Фернандо Торрес дар дақиқаи 35-уми вохӯрӣ аз майдон баъди корти дуввуми зард ронда намешуд, шояд 88 534 нафар мухлисони дар варзишгоҳ буда ва миллионҳо тамошобинони «оинаи нилгун»  дар саросари олам бозии дигари “Атлетикоро”-ро тамошо мекарданд. Ба ҳар навъ, Торрес пеш аз майдонро тарк кардан дар дақиқаи 25-ум аз байни пойҳои дарвозабони “Барселона” тер Штеген голи меҳмононро ба самар расонд .

Дар нимаи дуввуми рақобат Луис Суарес бо маҳорати фардӣ “Барселона”-ро бо ду голи задааш ба сӯи пирӯзӣ кашид ва онро ғолиб гардонд.

Як голи задаи “Атлетико” дар сафар то вохӯрии такрорӣ барои ба даври нимниҳоӣ баромадан  тухми умедро ба дили мухлисонаш мекорад.

Дар бозии дуввуми рӯз мутахассисони соҳаи футбол бар он ақида буданд, ки “Бавария”-Олмон “Бенфика”-и Португалияро бо натиҷаи калон мағлуб мекунад, аммо пешгӯиҳо хато баромаданд. Ягона голи задаи Артуро Видал дар дақиқаи 2-юм тақдири вохӯриро ба нафъи “Бавария” ҳал кард.

Ба ҳамин тариқ, мухлисони бозиҳои Лигаи чемпионҳои Аврупоро дар вохӯриҳои такрорӣ натоиҷи пешгӯинашаванда интизор аст.