Ғалабаи душвори «истиқлолиҳо» дар даври сеюм

Душанбе, 22.04.2016 /АМИТ «Ховар»/. Дар доираи даври сеюми Чемпионати Тоҷикистон оид ба футбол байни дастаҳои Лигаи олӣ дирӯз дар варзишгоҳи “Металлург”-и шаҳри Турсунзода “Регар ТадАЗ” чемпиони чоркаратаи кишвар- “Истиқлол”-и Душанберо ба ҳузур пазируфт. Бозӣ ниҳоят тезутунд гузашт. Соҳибони майдон тавассути голи задаи Комрон Турсунов аллакай дар дақиқаи 5-уми вохӯрӣ ба сафи пеш баромаданд ва бо натиҷаи 1 бар 0 ба танаффус рафтанд.
Сармураббии дастаи “Истиқлол” Мубин Эргашев барои баробар кардани ҳисоб низоми бозиро дигар карда, ба ҷои муҳофизатгарон-Ҷаҳонгир Ҷалилов, Петро Ковалчук ва Маҳдии Чоҳҷӯӣ — Аҳтам Назаров, Нозим Бобоҷонов ва Акмал Холматовро ба майдон баровард.
Дар натиҷа Акмал Холматов дар дақиқаи 49-ум натиҷаро баробар кард. Баъди 4 дақиқаи дигар Манучеҳр Ҷалилов голи дуюмро ба самар расонида, меҳмононро пешсаф кард. Аммо бо норозигӣ аз ин натиҷа муҳофизатгари турсунзодагиҳо Алишер Шарифов ҳисобро баробар кард. Агар голи дуввуми Манучеҳр Ҷалилов (голи сеюми “Истиқлол”) вориди дарвоза намегардид, соҳибони майдон соҳиби як имтиёз мешуданд.
“Истиқлол” пеш аз сафар ба Урдун, ки дар он ҷо бозии навбатии Ҷоми Конфедератсияи футболи Осиёро рӯзи 26-уми апрел бо клуби “Алфайсалӣ” барпо мекунад, ғалабаи сеюми худро ба даст оварда, дар бозии сеюми мавсими соли 2016 бо натиҷаи 3 бар 2 комёб шуд.
Бозиҳои боқимондаи даври навбатӣ рӯзҳои 23-юм ва 24-уми апрел барпо мегарданд. “Хуҷанд” бо “Парвоз”, “Хайр” бо КМВА “Помир”, “Ҳосилот” бо “Вахш” ва “Барқчӣ” бо “Равшан” вориди рақобат мешаванд.