Арабистони Саудӣ: қадам ба сӯи ислоҳот

Душанбе, 27.04.2016. /АМИТ «Ховар»/.  Мамлакати Арабистони Саудӣ тарҳи нави ислоҳоти иқтисодии кишварашро бо унвони «Нигоҳи шоҳигарӣ 2030» пешниҳод кардааст.
Подшоҳи Арабистони Саудӣ Салмон ибни Абдулазиз Оли Сауд зимни муроҷиат ба сокинони кишвараш оид ба заруриаи ислоҳоти иқтисодӣ изҳори назар карда, гуфтааст: «Аз ҷониби мо ба Шӯро оид ба масъалаҳои иқтисодӣ ва рушди мамлакат нақшаи ислоҳоти иқтисодӣ барои давраи то соли 2030 пешниҳод шудааст».
Раиси Шӯро оид ба масъалаҳои иқтисодӣ ва рушди Мамлакати Арабистони Саудӣ шоҳзода Муҳаммад ибни Салмон ибни Абдулазиз, ки ҳамзамон вазири мудофиаи ин кишвар мебошад, тасмими шоҳигариро вобаста ба ислоҳоти иқтисодӣ шарҳ дода, чунин гуфтааст: «Ҳадаф аз ислоҳоти иқтисодӣ бартараф намудани вобастагии иқтисодиёти Арабистони Саудӣ аз истихроҷ ва фурӯши нафт мебошад. Вобастагӣ аз нафту газ бар замми хатари ҷиддӣ доштан, ҳамчунин намегузошт, ки дигар бахшҳои иқтисодии мамлакат рушд кунанд».
Дар назар дошта шудааст, ки ислоҳоти иқтисодӣ муддати 15 сол – то соли 2030 идома ёфта, дар доираи он саҳмияҳои ширкати давлатии нафтрасони «Арамко» (Saudi Aramco) ба фурӯш бароварда мешаванд. Аз фурӯши ҳамагӣ панҷ фоизи саҳмияҳои ин ширкати азими давлатӣ гирифтани даромади соф ба маблағи 2 трлн. доллари ИМА пешбинӣ шудааст.
Мувофиқи маълумоти мавҷуда ширкати нафтрасони «Saudi Aramco» ҳамарӯза даҳ фоизи нафти ҷаҳониро истеҳсол карда, фаъолият ва даромади иқтисодии бузургтарин корхонаҳои коркарди нафт ва муассисаҳои кимиёвиро таҳти назорати худ гирифтааст.
Буҳрони молиявӣ-иқтисодии ҷаҳон, се-чор баробар поён рафтани арзиши нафту газ дар бозори ҷаҳонӣ кишварҳои истеҳсолкунандаи нафтро водор кардааст, ки роҳҳои алтернативии рушди минбаъдаи иқтисодиётро ҷустуҷӯ намоянд. Ҳамин аст, ки подшоҳи Арабистони Саудӣ зимни суханронии худ гуфт: «Умед дорем, ки иқдоми мо барои дигар кишварҳои олам ҳамчун намуна мегардад».