Аввалин бозии “Парвин”, “Коммуна” ва “Ваҳдат” дар Лигаи якум

Душанбе, 22.04.2016 /АМИТ «Ховар»/. Дирӯз дар даври аввали бозиҳои Чемпионати мамлакат оид ба футбол байни дастаҳои Лигаи якум се дастаи нав ба рақобатҳо шурӯъ карданд. “Парвин”-и Бохтар дар меҳмонии “Помир” – и Душанбе ба аввалин бохти худ рӯ ба рӯ шуд. “Помир” дар симмати дастаи мунтахаби наврасони то 14- солаи кишвар ба дарвозаи меҳмонони худ 4 тӯб зада, аз дарвозааш як тӯб гирифт.
Дастаҳои “Коммуна”-и Фархор ва “Ваҳдат”-и Ваҳдат дар ноҳияи Фархор ба дидори ҳам рафтанд. Дар натиҷа футболбозони шаҳри Ваҳдат бо ҳисоби 3:2 пирӯзӣ ба даст оварда, соҳиби се холи аввалин гаштанд.
Дар ин рӯз ҳамчунин бозии байни дастаҳои “Канд” ва “Саройкамар” доир шуд ва бо ғалабаи меҳмонон (1:2) анҷом ёфт.
Мутаассифона, дар шаш бозии даври аввал доварон 8 нафар бозингаронро аз майдон ронданд, ки ин ташвишовар аст.
27 апрел дар даври дуввуми мусобиқа “Ваҳдат” бо “Помир”, “Зарафшон” бо”Коммуна”, “Саройкамар” бо “Локомотив”ва 28 апрел “Чашма” бо “Канд”, “Панҷшер” бо “Ҳулбук” ва “Исфара” бо “Кӯктош” вориди сабқат мешаванд.