Баскетболбозони Донишкадаи политехникӣ- ғолиби спартакиада

Хуҷанд, 14.04.2016 /АМИТ «Ховар»/. Дар доираи чорабиниҳои Раёсати кор бо ҷавонон, варзиш ва сайёҳии вилояти Суғд бахшида ба 25-солагии Истиқлолияти давлатии Ҷумҳурии Тоҷикистон спартакиадаи донишҷӯён аз рӯи намудҳои варзишии бокс, футбол, волейбол, баскетбол ва гӯштин идома дорад.
Дастаи баскетболбозони Донишкадаи политехникии Донишгоҳи техникии Тоҷикистон ба номи академик М.С. Осимӣ дар шаҳри Хуҷанд аз рӯи намуди баскетбол бар ҳамаи рақибони худ пирӯз шуда, ғолиби спартакиада гардид. Зинаҳои баъдиро дастаҳои Донишкадаи иқтисод ва савдо ва Донишгоҳи давлатии Хуҷанд соҳиб шуданд.
Чанд рӯз қабл варзишгарони ин донишкада аз рӯи намуди волейбол ҷойи сеюмро миёни муассисаҳои олӣ ва миёнаи махсус соҳиб шуданд.
Спартакиада аз рӯи дигар намудҳои варзишӣ идома дорад.
Ёдовар мешавем, ки дастаи баскетболбозони донишкада соли гузашта дар спартакиадаи ҷумҳуриявӣ мақоми сеюмро касб карда буд.
Дар ин бора Абдусабур Абдуваҳҳобов, котиби матбуотии ДПДТТ ба АМИТ «Ховар» хабар дод.