Беш аз 400 миллион $ Олмон барои татбиқи ду тарҳ дар шимоли Тоҷикистон

Душанбе,15.04.2016/АМИТ Ховар/. Ширкати «Hos Powertech International SDN BND»-и Олмон тасмим гирифтааст дар шимоли Тоҷикистон бо сармоягузорӣ дар татбиқи ду лоиҳа иштирок намояд. Дар ин росто 15 апрел вакилони палатаи поёнии Парлумони Тоҷикистон Шартномаи консессияи Неругоҳи барқи ҳароратии «Шӯроб» байни Ҳукумати Ҷумҳурии Тоҷикистон ва ширкати «Hos Powertech International SDN BND»- и Олмонро ба тасвиб расонданд.
Қодири Қосим раиси Кумитаи давлатии сармоягузорӣ ва идораи амволи давлатӣ, ҳадаф ва аҳамияти ин санадро дар назди вакилони Парлумон шарҳ дода, гуфт ки дар асоси ин шартнома ширкати олмонии «Hos Powertech International SDN BND»- ду тарҳро дар шимоли мамлакат амалӣ менамояд, ки онҳо таҷдиди
Ҷамъияти саҳомии шакли кушодаи «Ангишт» /кони ангишти Шӯроб -Исфара/, сохмтони неругоҳи барқи ҳароратии «Шӯроб» бо иқтидори истеҳсолии 300 мегаватт неруи барқ ва дигар инфрасохтори иҷтимоӣ мебошанд. Барои татбиқи ин ду тарҳ ширкати олмонӣ беш аз 400 миллион $ сармояи мустақим ҷудо менамояд. Татбиқи лоиҳаи мазкур баъди ба анҷом расонидани асосноккунии иқтисодию техникӣ аз ҷониби ширкати олмонии «Фихнер», ки он дар зарфи як сол идома меёбад, оғоз мегардад. Амалӣ намудани ин тарҳ аз ҷониби сармоягузорони олмонӣ дар шимоли Тоҷикистон дар самти татбиқи яке аз се ҳадафи стратегии кишвар ноил- гардидан ба истиқлолияти энергетикӣ хеле муассир арзёбӣ мегардад.