Бохти чоруми “Истиқлол”

Душанбе, 27.04.2016 /АМИТ «Ховар»/. Дирӯз чемпиони Тоҷикистон “Истиқлол”-и Душанбе дар доираи бозиҳои гурӯҳи “Б”-и Ҷоми Конфедератсияи футболи Осиё дар муқобили дастаи “Алфайсалӣ”-и Урдун ба бохти чоруми худ рӯ ба рӯ шуд. Футболбозони урдунӣ дар панҷ дақиқаи поёни қисми аввал хати дифои “Истиқлол”-ро маҷбур карданд, ки ба хатоӣ роҳ диҳад. Дар натиҷа Халил Баниятеҳ дар дақиқаи 33-юм ҳисобро боз кард.  Муҳаммад Аррифоӣ голи дуввуми соҳибони майдонро ба дарвозаи Стошич равон намуд.
Дар нимаи дуввуми бозӣ  Ёсин Бакит боз як голи дигарро ба дарвозаи чемпиони Тоҷикистон равон кард. Баъди ин гол “истиқлолиҳо”  тавассути голҳои Александр Каблаш ва Парвиз Умарбоев дар ҳисоби бозӣ тағйирот ворид карданд. Аммо голи задаи Халил Баниятеҳ(голи дуввумаш дар ин вохӯрӣ)  охирин тӯбе буд, ки вориди дарвоза гардид ва чемпиони чоркаратаи Тоҷикистон бо натиҷаи 4 бар 2 ба шикасти чоруми худ аз панҷ вохӯрӣ рӯ ба рӯ гардид.
Дар бозии байни дастаҳои “Тараблус” ва “Нафт Алвасат” меҳмонон бо натиҷаи 3 бар 1 ғолиб омаданд.