Боздиди намояндагони Бундестаг аз Парлумони Тоҷикистон

Душанбе, 04.04.2016 /АМИТ «Ховар/.«Байни Ҷумҳурии Тоҷикистон ва Ҷумҳурии Федеративии Олмон беш аз 40 Созишномаи ҳамкории байниҳукуматӣ ба имзо расидааст, ки он дар тақвияти ҳамкории гуногунсоҳаи ду кишвар нақши муассир мегузорад». Ин нуктаро Шукурҷон Зуҳуров-раиси палатаи поёнии Парлумони Тоҷикистон дар мулоқоташ бо ҳайати Бундестаги Олмон Фолкмар Фогел, Дагмер Шмидт, Катрин Кунерт ва Йоханнес Дитрих дар Душанбе иброз дошт. Шукурҷон Зуҳуров бо дахли равобити байнипарлумонии Тоҷикистону Олмон зикр кард, ки миёни Маҷлиси намояндагон ва Бундестаги Олмон гурӯҳи дӯстӣ ва ҳамкорӣ фаъолият дорад. Фаъолияти гурӯҳҳои дӯстӣ-парлумонӣ барои рушди равобити ду кишвар дар бахшҳои мухталиф заминаи мусоид фароҳам меорад. Инчунин таъкид гардид, ки омӯзиш ва истифодаи таҷрибаи қонунофарии парлумонҳои ҳамдигар мувофиқи мақсад аст.
Шукурҷон Зуҳуров ба ҳайати парлумонии Олмон доир ба захираҳо ва имконоти иқтисодии Тоҷикистон иттилоъ дода, тақвияти ҳамкории ҳар ду кишварро дар бахшҳои мухталиф яке аз самтҳои афзалиятнок арзёбӣ намуд.
Мусоҳибон ҳамзамон дар мулоқот доир ба вазъи минтақа, хусусан авзои Афғонистон ва мубориза бар зидди ҳама гуна хатар ва таҳдидҳои замони муосир табодули назар карданд.