Чемпионати Тоҷикистон оид ба футбол оғоз меёбад

Душанбе, 7.04.2016. /АМИТ «Ховар»/. Имрӯз дар Варзишгоҳи марказии шаҳри Душанбе бо бозии байни дастаҳои “Истиқлол”-и Душанбе ва “Парвоз”-и ноҳияи Бобоҷон Ғафуров Чемпионати Тоҷикистон оид ба футбол байни дастаҳои лигаи олӣ оғоз меёбад.
Тавре аз Федератсияи футболи Тоҷикистон иттилоъ доданд, дар мавсими соли 2016, ки маротибаи 25-ум гузаронида мешавад, дар мусобиқот 10 даста ширкат меварзанд. Дар рақобатҳои даври аввал ба ғайр аз “Истиқлол” ва “Парвоз”, инчунин “Регар ТадАЗ”бо КМВА “Помир” ва”Хуҷанд” бо “Вахш”( 9 апрел) ва “Хайр” бо “Равшан”(10 апрел) вориди майдон мешаванд. Оғози бозиҳо соати-16.
Тавре пештар хабар дода будем, аз сабаби ба мушкилоти молиявӣ дучор шудан дастаи “Далерон-Уротеппа”, соҳиби медалҳои биринҷии мавсими футболи соли 2014 аз ҳаққи иштирок дар мусобиқа даст кашид.
“Ҳосилот”-и Фархор ягона дастае мебошад, ки аз лигаи якум ба лигаи олӣ гузаштааст.