Дар арафаи 25- солагии Истиқлолият беморхонаи нав барои беморони сил ба истифода дода мешавад

Душанбе, 1.04.2016. (АМИТ «Ховар»). — Дар арафаи ҷашни 25- солагии Истиқлолияти Ҷумҳурии Тоҷикистон беморхонаи нав барои беморони сил бо тамоми таҷҳизоти замонавӣ ба истифода дода мешавад.
Бо дастгирии Ҳукумати Ҷумҳурии Тоҷикистон ва маблағгузории Бонки Рушди Олмон моҳи июни соли 2014 дар ҷамоати деҳоти Деҳмойи ноҳияи Ҷаббор Расулов сохтмони беморхонаи нав барои беморони сил оғоз шуда, ҳоло дар арафаи анҷомёбист.
Ба иттилои сардухтури маркази мубориза бар зидди бемориҳои сил дар вилояти Суғд Даврон Мадаминов беморхона аз ду бинои 2 ва 3 ошёна иборат буда, барои сохтмони он аз тарафи Бонки Рушди Олмон 27 миллион сомонӣ ҷудо гардидааст.
Ҳамчунин барои корҳои ободонӣ дар атрофи беморхона аз тарафи Мақомоти иҷроияи ҳокимияти давлатии вилояти Суғд зиёда аз 1 млн. сомонӣ ҷудо шуда буд.
Пас аз фаъол шудани беморхона дар он 27 мутахассис бо ҷои кор таъмин хоҳад шуд.