Дар Роғун 65 гектар боғи нав бунёд гардид

Роғун, 22.04.2016 /АМИТ «Ховар»/. Бо мақсади дар сатҳи баланд ҷашн гирифтани 25-солагии Истиқлолияти давлатии Ҷумҳурии Тоҷикистон ва истифодаи самараноки замин, кишоварзони шаҳри Роғун 34 ҳазору 400 бех ниҳоли сояафкану мевадиҳанда ва зиёда аз 20 ҳазор гулу буттаҳо шинониданд. Дар ҳудуди шаҳр то имрӯз 65 гектар боғҳои нав бунёд гардида, 22 гектар боғҳои кӯҳнаро аз нав барқарор намудаанд.
Тавре сардори идораи ҳифзи муҳити зисти шаҳри Роғун Сулҳиддин Раҷабов ба хабарнигори АМИТ «Ховар» иттилоъ дод, дар муддати се моҳ кормандони бахши мазкур дар якҷоягӣ бо дигар муассисаҳои назоратӣ 29 маротиба санҷишҳои муштарак гузарониданд, ки дар натиҷаи вайронкунии қоидаҳо баъзе аз шаҳрвандон ҷаримаи маъмурӣ шуда, 1170 сомонӣ ба буҷети шаҳр ворид гардид.