Дар се моҳ 73 200 нафар сайёҳ аз Тоҷикистон боздид намудаанд

Душанбе, 14.04.2016. /АМИТ Ховар/. Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар семоҳаи аввали соли 2016 барои дар амал татбиқ намудани санадҳои меъёрӣ-ҳуқуқии танзимкунандаи фаъолияти соҳа, муаррифии имкониятҳои туристии кишвар ва ҷалби ҷомеа ба ин соҳаи муҳими иқтисодиёти миллӣ як зумра чорабиниҳои хусусияти оммавӣ, илмӣ, таблиғотию ташвиқотӣ ва фарҳангиву сайёҳидоштаро дар сатҳи маҳал, ҷумҳурӣ ва байналмилалӣ баргузор намуд. Дар ин давра Кумита 76 адад чорабиниҳоро доир намудааст, ки аз ин шумора 52 адад чорабинии маҳаллӣ, 13 адад ҷумҳуриявӣ ва 11 адад байналмилалӣ ба ҳисоб рафта, ин нишондод нисбат ба ҳамин давраи соли гузашта 23 адад зиёд буда, шумораи фарогирифташудагон 96 604 нафарро ташкил медиҳад, ки ин нисбат ба ҳамин давраи соли гузашта 5840 нафар зиёд мебошад.
Давраҳои таълимӣ оид ба такмили ихтисоси мутахассисон дар дохили кишвар 3 адад буда, нисбат ба ҳамин давраи соли 2014, 2 адад зиёд ва шумораи фарогирифташудагон 300 нафарро ташкил медиҳад.
Давраҳои таълимӣ дар хориҷи кишвар низ 1 адад зиёд шуда, шумораи фарогирифташудагон ба имкониятҳои туристии Тоҷикистон 27 нафар зиёд мебошад. Дар ин давра 89 101 нафар шаҳрванди хориҷӣ ба кишвар омадаанд, ки аз ин нишондод 73 200 нафарашон ба ҳайси турист арзёбӣ мегарданд.
Аз ҳисоби 73200 туристи хориҷӣ ба иқтисодиёти мамлакат 36 млн доллари амрикоӣ маблағ ворид гаштааст, зеро рушди туризм дар кишвар, пеш аз ҳама, ба беҳбудии иқтисодиёти мамлакат, таъсиси ҷойҳои нави корӣ, рушди инфрасохтор ва беҳтар гардидани сифати зиндагии мардум мусоидат менамояд. Хушбахтона, давоми се моҳи соли равон шакли ягонаи муайян намудани хизматрасонии ташрифоти сайёҳон ба кишвар тасдиқ гардида, аллакай роҳандозӣ гардидааст.
Дар ин давра Тоҷикистон тавонист дар 2 намоишгоҳи байналмилалии туристии дунё- «ITB Берлин» ва «Интурмаркет»-и Маскав иштирок намуда, имконият ва захираҳои туристӣ, ҳамзамон сифати қабул ва хизматрасониро низ муаррифӣ намояд.