Дастаи “Нафт Алвасат”- пешсафи гурӯҳи “Б”-и Ҷоми КФО ба Душанбе омад

Душанбе, 11.04.2016 /АМИТ«Ховар»/. Пагоҳ дар бозии чоруми Ҷоми Конфедератсияи футболи Осиё дар гурӯҳи “Б” дар Варзишгоҳи марказии шаҳри Душанбе “Истиқлол”бо клуби футболи “Нафт Ал васат”-и Ироқ қувва меозмояд.
Дар бозии аввали ин дастаҳо “Нафт Алвасат” дар шаҳри Теҳрон футболбозони моро бо натиҷаи 2 бар 0 мағлуб карда буд. Аз ин рӯ дар назди футболбозони “Истиқлол” вазифаи пурмасъулият- ҷавоб гуфтан ба ҳамон бохт гузошта шудааст.
Бо ҳамин мақсад “Нафт алвасат “ се рӯз пеш аз бозии расмӣ ба шаҳри Душанбе ҳозир шуд ва бо шароити майдони марказӣ ошно гардида, машқҳои худро ҳар рӯз барпо менамояд. Дар раддабандии гурӯҳи “Б” дастаи “Нафт Алвасат” дар садри ҷадвали мусобиқот қарор дошта, соҳиби 6 имтиёз аст ва барои мавқеи худро боз ҳам беҳтар кардан ба вохӯрӣ бо дастаи “Истиқлол” бо ҳамаи бозингарони асосиаш, ки 21 нафарро ташкил медиҳанд, ҳозир шуд.
Дар бозии аввали ин дастаҳо Ҷосим Муҳаммад ва Мардек Мардакиён ба дарвозаи Стошич голҳоро зада буданд.
«Истиқлол»-и Душанбе низ ба ин бозӣ тайёрии пухта дидааст, аммо дар ҳайати даста ширкат накардани Нуриддин Давронов ва Аҳтам Назаров барои мураббиёни мо мушкилот пеш хоҳад овард.
Дар нишасти матбуотие, ки имрӯз баргузор мешавад, сармураббиёни дастаҳо ба саволҳои рӯзноманигорон посух хоҳанд дод.
Ёдрас мешавем, ки баъд аз бозии “Нафт алвасат” бо “Истиқлол” дар шаҳри Теҳрон сармураббии меҳмонон Ҳамза Ҷамол аз Миср бо сабабҳои оилавӣ дастаро тарк кард ва акнун ин дастаро Соир Аҳмад ба ҳайси сармураббӣ ба Тоҷикистон овардааст.