“Диси инвест” соҳиби Ҷоми Тоҷикистон гардид

Душанбе, 11.04.2016 /АМИТ«Ховар»/. Дар Маҷмааи варзишии Агентии “Тоҷикстандарт” дар вохӯрии ниҳоии Ҷоми Тоҷикистон оид ба футзал дастаи “Диси Инвест” –и Душанбе бар “Сипар”-и Хуҷанд бо натиҷаи 3 бар 0 ғалаба карда, соҳиби Ҷоми Тоҷикистон гардид.
Вохӯрӣ ниҳоят тезутунд гузашт ва бо ҳамлаи тарафайн сурат гирифт. Дар нимаи аввали бозӣ ягон даста ба задани гол муваффақ нагардид.
Баробари оғоз гардидани нимаи дуввуми бозӣ муҳофизатгари “Сипар” Паймон Сарлак ба хатоӣ роҳ дода, тӯбро ба дарвозаи дастааш равон карда, “Диси Инвест”-ро ба сафи пеш баровард.
Футзалбозони соҳили Сир барои баробар кардани ҳисоб дарвозабонашонро бо бозингари майдон иваз карданд ва ин ба “Диси Инвест” имкон фароҳам овард, ки дар дақиқаҳои охири мусобиқа ба задани ду голи дигар мушарраф шаванд. Аввал Муҳаммад Раҳмонов ва баъдан Шавкат Ҳалимов аз зарбаи 10- метра ба дарвозаи “Сипар” ду голи дигар зада, натиҷаро ба 3 бар 0 расониданд ва дар мавсими футзали соли 2016 аввалин ҷоизаашонро ба даст оварданд.
Бозингари беҳтарини вохӯрӣ Муҳаммад Раҳмонов дониста шуд. Ба дастаҳо медалҳо супорида шуданд. «Диси инвест» Ҷоми мамлакатро соҳиб шуд.