Доварон муҷозот шуданд

Душанбе, 20.04.2016 /АМИТ «Ховар»/. Кумитаи доварони Федератсияи футболи кишвар вобаста ба доварон ва нозирони мусобиқоти Лигаи олии мамлакат як қатор таҳримоти худро содир кард. Дар натиҷа ду довар ва ду нозири бозиҳо аз фаъолият дар ду вохӯрии минбаъда дар Лигаи олӣ дур карда шуданд.
Бино ба иттилои Алишер Урунов, менеҷери ФФТ, ки дар ин ҷаласа раисӣ кард, довар Насрулло Кабиров аз шаҳри Норак дар вохӯрии байни дастаҳои КМВА “Помир” ва “Хуҷанд” дар ду маврид ба хатоӣ роҳ дод, ки он ба натиҷаи бозӣ таъсири амиқ расонд.
Ёвари довари вохӯрии байни дастаҳои “Ҳосилот” ва “Барқчӣ” Исмоил Нуралиев ҳам ба иштибоҳ роҳ додааст.
Баъди тамошои наворҳои ин вохӯриҳо Кумита ба хулоса омад, ки Насрулло Кабиров ва Исмоил Нуралиевро аз ҳаққи иштирок дар ду бозӣ маҳрум кунад.
Нозирони вохӯрии байни дастаҳои “Ҳосилот” ва “Барқчӣ”, инчунин “Парвоз” ва “Регар ТадАЗ” Насриддин Азизов ва Аюбҷон Солиев низ барои дуруст ташкил накардани бозӣ ва ба беаҳамияти роҳ додан аз нозирии ду вохӯрӣ дар канор шуданд.