«Хуҷанд» ғалабаи дуюми худро ба даст овард

Душанбе, 19.04.2016 /АМИТ «Ховар/. Бозиҳои даври навбатии Чемпионати мамлакат байни дастаҳои лигаи олӣ баргузор шуданд. Дар ин давр дастаи футболи «Хуҷанд»-и Хуҷанд дар сафар бар КМВА «Помир» бо ҳисоби 1:0 пирӯз шуд.
Голи ягонаро дар ин бозӣ ҳамлагари «Хуҷанд» ва тими мунтахаби миллии Тоҷикистон Фарҳод Тоҳиров ба ҳадаф расонд. Ин ғалабаи дуюми пайдарҳами дастаи соҳили Сирдарё дар чемпионати имсола мебошад.
Дастаи футболи «Ҳосилот»-и Фархор низ дар ин давр ба ғалаба муваффақ шуд. Фархориҳо дар меҳмонӣ бар «Равшан»-и Кӯлоб бо ҳисоби 2:0 ғалаба карданд. Голҳои «Ҳосилот»-ро бозингарони собиқи «Равшан» Абдурасул Раҳмонов ва легионери ганагӣ Мусо Содиқ ба ҳадаф расонданд.