“Истиқлол” имконияти мубориза барои Ҷоми КФО-ро аз даст дод

Душанбе, 13.04.2016 (АМИТ «Ховар»).-Чемпиони соли гузаштаи Тоҷикистон “Истиқлол”-и Душанбе баъди ғалабаҳои пайдарпай дар мусобиқоти Ҷоми Конфедератсияи футболи Осиё 2015, ки то ба бозии ниҳоӣ расида буд, баъди бохти дирӯзааш аз дастаи “Нафт Алвасат”-и Ироқ ҳама имконияти муборизаро барои Ҷом аз даст дод.
Хати ҳуҷуми истиқлолиҳо дар ин бозӣ лаҳзаҳои хуби голзаниро истифода набурда, имкон дод, ки дар дақиқаи дуюми вақти иловагӣ Ҷосим Муҳаммад тӯби ягонаро дар Варзишгоҳи марказии шаҳри Душанбе дар ҳузури 8 000 нафар тамошобин ба дарвозаи “Истиқлол” ворид намояд.
Дар бозии дуввуми гурӯҳи «Б» “Алфайсалӣ”-и Урдун дар майдонаш “Тароблус”-и Лубнонро бо натиҷаи 3 бар 1 шикаст дод.
Ба ҳамин тартиб “Нафт Алвасат” бо 9 имтиёз, “Алфайсалӣ” бо 8, “Тароблус” бо 4 ва “Истиқлол” бо 1 хол дар гурӯҳи “Б” ҷойҳоро тақсим кардаанд.
Бозии ояндаашро “Истиқлол” рӯзи 26 апрел бо “Алфайсалӣ” дар Урдун барпо мекунад.