Мусодираи зиёда аз 38 кило маводи нашъадор дар Истаравшан

Душанбе, 20.04.2016 /АМИТ «Ховар»/. Кормандони милитсияи ШВКД дар шаҳри Истаравшан зимни гузаронидани чорабиниҳои фаврӣ-ҷустуҷӯӣ сокини 30-солаи шаҳри Душанберо дар гумонбарӣ ба муомилоти ғайриқонунии маводи нашъадор дастгир намуданд.
Дар вақти кофтукови шахсӣ аз гумонбаршуда 36 килою 830 грамм маводи нашъадори ҳашиш дарёфт ва мусодира карда шуд.
Тавре аз Хадамоти матбуотии Вазорати корҳоли дохилӣ ба АМИТ «Ховар» хабар доданд, сокини 25-солаи шаҳри Кӯлоб низ дар робита ба ҷинояти мазкур дастгир гардид. Кормандони фаврии мақомот аз гумонбаршуда 2 килою 126 грамм маводи нашъадори ҳашиш дарёфт ва мусодира намуданд.
Дар маҷмӯъ, маводи нашъадори мусодирагардида 38 килою 956 граммро ташкил медиҳад.
Нисбат ба далелҳои мазкур парвандаҳои ҷиноятӣ оғоз карда шуда, тафтишот идома дорад.