Ҷоми олии Тоҷикистон насиби кӣ хоҳад шуд?

Душанбе, 1.04.2016 (АМИТ «Ховар»).- Маротибаи 7-ум мусобиқа барои Ҷоми олӣ ё худ Суперҷоми Тоҷикистон баргузор мешавад ва ФФТ барои гузаронидани ин рақобати ниҳоят муҳим, ки ба оғоз шудани мавсими футбол дар соли 2016 дар Лигаи олии Лигаи миллии футбол замина мегузорад, варзишгоҳи Металлург-и шаҳри Турсунзодаро интихоб кард. Бозӣ дар соати 14-и рӯзи 3 апрел шурӯъ мегардад.
Чемпиони мамлакат ва соҳиби Ҷоми Тоҷикистон дар мавсими гузашта, -Истиқлол-и Душанбе бо барандаи медалҳои нуқра,- Хуҷанд-и Хуҷанд вориди майдон мешаванд. Дар ҳоле, ки ин бозӣ дар варзишгоҳи тими Регар ТадАЗ-Металлург мегузарад, муайян нашудааст, ки мухлисони Регар ТадАЗ ба кадом даста таваҷҷуҳ доранд ва онро мухлисӣ мекунанд. Аммо дӯстдорону таблиғгарони дастаи Истиқлол-и Душанбе бо карнаю сурнаи худ барои таблиғу дастгирии чемпион ба варзишгоҳ меоянд.
Мусобиқа барои Ҷоми олии Тоҷикистон аз соли 2010 гузаронида шуда, то ба имрӯз панҷ маротиба онро Истиқлол ва як маротибаи дигар Равшан-и Кӯлоб ба даст овардаанд:
2010 «Вахш» (Қурғонтеппа) «Истиқлол» (Душанбе) 0:2
2011 «Истиқлол» (Душанбе) «Регар-ТадАЗ» (Турсунзода) 1:0
2012 «Истиқлол» (Душанбе) «Регар-ТадАЗ» (Турсунзода) 2:1
2013 «Равшан» (Кӯлоб) «Регар-ТадАЗ» (Турсунзода) 2:1
2014 «Равшан» (Кӯлоб) «Истиқлол» (Душанбе) 0:5
2015 «Истиқлол» (Душанбе) «Хайр» (Ваҳдат) 2:2. Аз силсилаи зарбаҳои пеналти 4:3