“Парвоз” “Регар ТадАЗ”-ро дар ҳайрат гузошт

Душанбе, 18.04.2016 /АМИТ «Ховар»/.-Дар бозиҳои даври дуввуми Чемпионати мамлакат оид ба футбол дастаи “Парвоз”-и ноҳияи Бобоҷон Ғафуров ғайричашмдошт ғолиби Ҷоми имсолаи Федератсияи футболи Тоҷикистон ва дорандаи медалҳои биринҷии мавсими соли 2015-“Регар ТадАЗ”-ро бо натиҷаи 1 бар 0 мағлуб кард.
Тӯби ягонаро Меҳрулло Бобоев, ки соли равон аз дастаи “Далерон-Уротеппа” ба дастаи “Парвоз” гузаштааст, ба ҳадаф расонд.
Ёдрас мешавем, ки соли гузашта тими “Парвоз”-и ноҳияи Бобоҷон Ғафуров дар Чемпионати мамлакат ҳамагӣ як ғалаба ба даст оварда, дар зинаи охирин ҷойгир шуда буд.
Дар ин давр “Ҳосилот”-и Фархор ба аввалин пирӯзии худ комёб гардид. Ин даста бар “Равшан”-и шаҳри Кӯлоб бо натиҷаи 2 бар 0 ғалаба кард.
Натиҷаи бозиҳои дигар чунин аст: “Истиқлол”-“Барқчӣ” 4 :3, КМВА “Помир”-“Хуҷанд” 0:1, “Вахш”- “Хайр” 0:0.