Шашумин Суперҷоми «истиқлолиҳо»

Душанбе, 4.04.2016 /АМИТ «Ховар»/. «Истиқлол»-и Душанбе дирӯз дар варзишгоҳи «Металлург»-и шаҳри Турсунзода дар баробари «Хуҷанд»-и Хуҷанд барои комёб шудан ба Суперҷоми Тоҷикистон дар соли 2016 вориди майдон шуд ва бо натиҷаи 3 бар 2 ғалаба кард.
Ҳавои боронӣ ва майдони сероб ба бозии ҳар ду даста таъсири худро расонида бошад, ҳам тамошобинон аз ҳунарнамоии ҳар ду даста қаноатманд шуданд. Тақрибан 4 000 мухлис ба ду гурӯҳ ҷудо шуда, ҳар ду дастаро ташвиқу тарғиб мекарданд.
Легионери украинии дастаи Истиқлол Александр Каблаш дар ин рақобат аз ҳама беҳтар буд ва маҳз тавассути ду голи задааш «Истиқлол»-ро ба муроду мақсад расонд. Тӯби аввалинаш дар дақиқаи 13 ум ва дуввумаш дар дақиқаи 82-ум вориди дарвоза шуд. Як голи дигарро аз дастаи «Истиқлол» муҳофизатгари даста Давронҷон Эргашев ба ҳадаф расонд.
Аз дастаи «Хуҷанд» Фарҳод Тоҳиров (11-метра) ва Дилшод Каримов муаллифи голҳо шуданд.
Дар поёни мусобиқа роҳбарони Кумитаи ҷавонон, варзиш ва сайёҳии назди Ҳукумати мамлакат, ФФТ ва шаҳри Турсунзода ба ғолибон Суперҷом ва медалҳои тиллою нуқраро ҳадя карданд.
Бозингари беҳтарини вохӯрӣ Александр Каблаш, легионери «Истиқлол» эълон гардид. Ба ҳамин тариқ «Истиқлол» маротибаи шашум соҳиби Суперҷоми Тоҷикистон гардид.