Теъдоди довталабон аз ноҳияи Мурғоб дар ММТ хеле кам аст

Хоруғ 8.04.2016 /АМИТ «Ховар»/. Масъулини бахши минтақавии Маркази миллии тестии назди Президенти Ҷумҳурии Тоҷикистон дар шаҳри Хоруғ аз имконоти мавҷуда ва тадбирҳои иловагӣ истифода бурда, кӯшиш мекунанд, ки ягон нафар аз хатмкунандагон аз имтиҳоноти тестӣ дар канор намонад.
Масъули маркази мазкур Мадина Шоҳназарова гуфт, ки имрӯз 60 % иҷрои нақшаи сабти номи довталабон дар марказҳои миллии тестӣ ба иҷро расидааст.Дар ҳудуди кишвар 38 донишгоҳу донишкада ва 23 муассисаи таълимии касбӣ бо зиёда аз 500 ихтисос фаъолият доранд. Ба гуфтаи ӯ, раванди сабти ном дар дигар навоҳӣ бо маром давом дорад.
Дар ноҳияи Мурғоб то ба ҳол аз миёни 191 нафар хатмкунандагон танҳо 50 нафарашон ба нуқтаи бақайдгирии сайёри тестӣ муроҷиат кардаанд.
«Мо кӯшиш мекунем, ки баҳри иҷрои қарори раиси вилоят «Дар бораи тасдиқи таъсиси муассисаи давлатии Маркази миллии тестӣ» ва иҷрои Қарори Ҳукумати Ҷумҳурии Тоҷикистон «Дар бораи тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти олӣ ва миёнаи касбии Ҷумҳурии Тоҷикистон» корҳои фаҳмондадиҳиву ташвиқотиро миёни волидону фарзандон бештар намоем»-, илова намуд масъули бахши минтақавии Маркази миллии тестӣ.