Телевизион ва радио аз тарғибгарони асосии меъёрҳои забони адабӣ мебошанд

Душанбе, 6.04.2016 /АМИТ «Ховар»/. Дар мулоқотҳое, ки кормандони Кумитаи забон ва истилоҳоти назди Ҳукумати Ҷумҳурии Тоҷикистон бо намояндагони шабакаҳои телевизион ва радио баргузор намуданд, оид ба татбиқи муқарароти Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» риояи талаботи қоидаҳои имлои забони тоҷикӣ, корбурди дурусти истилоҳоти соҳавӣ, рисолати таърихии забони тоҷикӣ ва арҷгузорӣ ба забони давлатӣ сухан рафта, камбудиҳои рўзноманигорон, ровиён ва наттоқону барандагони барномаҳо оид ба гуфтори ғалат, риоя нагардидани савтиёти овози тоҷикӣ, истифодаи калимаҳои ғалат дар забони радиову телевизион, навиштаҷоти ғайримеъёрӣ дар матни эълону рекламаҳо ва сатрҳои равони телевизионӣ мавриди муҳокима қарор дода шуданд.
Дар асоси таҳлилҳои пайвастаи мутахассисони Кумита оид ба забони барномаҳои шабакаҳои телевизионӣ ва нутқи ровиёну барандагони барномаҳои телевизионии «Шабакаи якуми телевизиони Тоҷикистон», МД «Телевизиони Сафина», МД «Ҷаҳоннамо», МД «Телевизиони кӯдакону наврасон- Баҳористон», Радиои Тоҷикистон ва чор шабакаи он, инчунин, таҳлилу баррасии матну забони рекламаву навиштаҷоти сатрҳои равон дар ин шабакаҳо ва бо дарназардошти хулосаи онҳо дар ин мулоқотҳо барои минбаъд поку беолоиш ва тоза нигоҳ доштани забони гуфтор тавсияҳои Кумита, аз ҷумла ба роҳ мондани омўзиши забони давлатӣ ва қоидаҳои имлои забони тоҷикӣ, назорати ҷиддии забони филмҳои тарҷумашуда, назорати мунтазами забони барномаҳо,назорати суханварӣ ва нутқи ровиён ва наттоқон, тарғиб ва ташвиқи забони давлатӣ тавассути силсилаи барномаҳо ва роликҳо, риояи дурусти талаботи Қоидаҳои имлои забони тоҷикӣ дар сатрҳои равон, таблиғи мунтазами татбиқи масъалаҳои ҳалталаби “Нақшаи Барномаи рушди забони давлатии Ҷумҳурии Тоҷикистон барои солҳои 2012-2016”, назорати ҷиддӣ ва дар доираи меъёри забони адабӣ таҳия ва сабт намудани мусоҳибаҳо, таҳия ва татбиқи нақшаи чорабинии ҳамкорӣ байни Кумитаи забон ва истилоҳоти назди Ҳукумати Ҷумҳурии Тоҷикистон ва Кумитаи телевизион ва радиои назди Ҳукумати Ҷумҳурии Тоҷикистон пешниҳод гардид.
Кумита бо мақсади арҷгузорӣ ба забони давлатӣ ва дуруст ба роҳ мондани сиёсати давлатии забон дар кишвар масъулони ВАО-ро дар рафти мулоқотҳо таъкид намуд, ки тарғибгари асосии забони адабии меъёр воситаҳои ахбори омма, аз ҷумла, кормандони телевизион ва радио маҳсуб меёбанд.
Дар анҷом аз ҷониби намояндагони Кумита ба кормандони шабакаҳои телевизионӣ ва радиоӣ иттилоъ дода шуд, ки барои риоя нагардидани муқаррароти Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» тибқи моддаи 89-и Кодекси мурофиавии ҳуқуқвайронкунии маъмурии Ҷумҳурии Тоҷикистон ҷавобгарӣ муқаррар карда шудааст.
Дар ин бора масъули Хадамоти ВАО-и Кумитаи забон ва истилоҳот Раҳим Зулфониён ба хабарнигори АМИТ “Ховар” хабар дод.