Тоҷикистон истифодаи ҳавопаймоҳои бесарнишинро таҳти назорати ҷиддӣ қарор медиҳад

Душанбе, 6.04.2016 /АМИТ «Ховар»/. Ҷумҳурии Тоҷикистон воридоту содирот, фурӯш, бақайдгирӣ ва истифодаи ҳавопаймоҳои бесарнишинро таҳти назорати ҷиддӣ қарор медиҳад. Дар ин росто 6 апрел вакилони палатаи поёнии Парлумони Тоҷикистон ба Кодекси фазои ҳавоии Ҷумҳурии Тоҷикистон тағйиру иловаҳо ворид намуданд.
Мансур Умаров, муовини аввали раиси Кумитаи давлатии амнияти миллии /КДАМ/ Ҷумҳурии Тоҷикистон дар назди вакилони Парлумон гуфт, ки лоиҳаи қонуни мазкур аз ҷониби гурӯҳи кории байниидоравии Ҳукумати Ҷумҳурии Тоҷикистон таҳия гардида, ба таҳкими амнияти давлатӣ нигаронида шудааст.
Мавсуф зикр кард, ки дар шароити ҷомеаи муосир таҳдидҳо ба амнияти давлатӣ ва бехатарии ҷамъиятӣ бо истифода аз технологияҳои муосир бисёр кишварҳои ҷаҳонро ба ташвиш овардааст. Ҳавопаймоҳои бесарнишин аз ҷониби созмонҳои террористию экстремистӣ ва гуруҳҳои муташаккили ҷиноятӣ метавонанд бо максади содир намудани амалҳои террористӣ, интиқоли маводи тарканда, мухаддир ва содир намудани дигар ҷиноятҳо истифода гарданд. Бино ба таҷрибаи кишварҳои пешрафтаи ҷаҳон дар ин самт, танзими истифодаи фазои ҳавоӣ вобаста ба корбурди ҳавопаймоҳои бесарнишин тақозои замон аст.
Мансур Умаров таъкид кард, тағйирот ба Кодекси фазои ҳавоии кишвар назорати давлатиро аз болои истифодаи фазои ҳавоии Ҷумҳурии Тоҷикистон ва ҳавопаймоҳои бесарнишин таъмин мекунад. Тибқи тағйирот ба Кодекси фазои ҳавоии кишвар, дастрасии ғайриқонунии шахсони бегона ба системаи авиатсионии бесарнишин маҳдуд мегардад.