А. Ғоиб ва Э. Миллард тавсеаи ҳамкориро баррасӣ намуданд

Душанбе, 17.05.2016/АМИТ «Ховар/. Масоили таҳкими ҳамкории гумрукии Тоҷикистону Амрико дар меҳвари мулоқоти Абдуфатоҳи Ғоиб ва Элизабет Инга Миллард -Сафири Иёлоти Муттаҳидаи Амрико дар Тоҷикистон қарор дошт. Сардори мақомоти гумруки Тоҷикистон ба дипломати амрикоӣ доир ба фаъолияти Хадамоти гумруки назди Ҳукумати Ҷумҳурии Тоҷикистон маълумот дода, нақши онро дар таъмини амнияти иқтисодии кишвар, мубориза бар зидди гардиши ғайриқонунии маводи мухаддир, ҳифзи сарватҳои моддиву фарҳангӣ, таҳкими сиёсати тиҷорати хориҷӣ ва ғанӣ гардонидани буҷаи кишвар муҳим арзёбӣ намуд.
Абдуфатоҳи Ғоиб бо дахли ҳамкории байналмилалии мақомоти гумруки кишвар афзуд, ки Хадамоти гумруки Тоҷикистон аз ҳамкории судманд бо Амрико дар самти таҳкими фаъолияти гумрукӣ бархурдор мебошад. Зикр шуд, ки дар доираи ҳамкорӣ аз ҷониби Ҳукумати Амрико ба мақомоти гумруки Тоҷикистон кумакҳо расонида мешаванд, ки он аз ироаи таҷҳизоту воситаҳои сайёри таъмини назорати гумрукӣ, сохтмон ва таҷдиди инфрасохтории иншооти гумрукӣ ва баргузории машғулиятҳои омӯзишӣ ба кормандони мақомоти гумрук иборат буда, ба баланд бардоштани сатҳи касбияти мутахассисон ва фаъолияти босамари хизматӣ мусоидат менамояд.
Дар навбати худ дипломати амрикоӣ аз дурнамои рушди муносибатҳои тиҷоратӣ ва ҳамкории гумрукӣ байни ду кишвар изҳори қаноатмандӣ намуда, афзуд, ки дар оянда бо назардошти имконоти мавҷуда он тавсеа хоҳад ёфт.