Ҷашни шоҳмот ва арҷгузорӣ ба Парчами давлатӣ аз ҷониби ҷавонон

Душанбе, 14.05.2016 /АМИТ «Ховар»/. Бахшида ба Рӯзи ҷавонони Тоҷикистон Вазорати корҳои дохилӣ, Кумитаи ҷавонон, варзиш ва сайёҳӣ, инчунин Иттифоқи ҷавонони Тоҷикистон дар доираи чорабиниҳо вобаста ба «20 рӯзи ҷавонӣ» имрӯз, 14 май дар 68 шаҳру ноҳияҳои ҷумҳурӣ «Мусобиқаи ҷумҳуриявии шоҳмотро барои таҳкими неруи зеҳнӣ ва пешгирии ифротгароӣ» ва Ҳамоиши ҷавононро таҳти унвони «Парчами миллӣ ифтихори ман!» оғоз кардаанд, ки мақсади он рушди шоҳмот, сайқал додани мафкураи зеҳнии наврасону ҷавонон, ҳамзамон пешгирии корҳои номатлуб, аз қабили авбошӣ, ғоратгарӣ, ифротгароӣ ва дар рӯҳияи худшиносиву худогоҳӣ тарбия намудани наврасону ҷавонон мебошад. Ҳамоиши мазкур то бегоҳ идома меёбад.
Инчунин имрӯз ҳамоиши ҷумҳуриявии «Ҷавонон ва раъйпурсӣ» бо иштироки васеи ҷавонон баҳри даъвати оммаи васеи мардум ба маъракаи муҳими сиёсӣ- раъйпурсии умумихалқӣ, таҳкими худшиносиву худогоҳӣ, зиракии сиёсӣ, таъмини иштироки фаъолонаи ҷавонон дар ҳаёти сиёсӣ, иқтисодӣ ва иҷтимоиву фарҳангии мамлакат ва баланд бардоштани мавқеи устувори онҳо дар бунёдкорӣ ва созандагии ҳар як ваҷаб хоки муқаддаси Тоҷикистони азиз доир мешавад.