Хадамоти муҳоҷират дар Хатлон вохӯриҳои иттилоотӣ доир кард

Душанбе, 13.05.2016. /АМИТ «Ховар»/. Кормандони Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар ноҳияи Дӯстии вилояти Хатлон якҷоя бо муовини раиси ноҳия, намояндаи шуъбаи иқтисоди мақомоти иҷроияи ҳокимияти давлатӣ бо ҷавонону муҳоҷирони меҳнатӣ ва наздикони онҳо вохўрии иттилоотӣ гузарониданд. Чунин вохӯриҳо дар ноҳияҳои Бохтару Вахш ва шаҳрҳои Қурғонтеппаву Сарбанд низ доир карда шуданд.
Сардори Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Хатлон Маҳмудҷон Хоркашев дар хусуси тағйиру иловаҳои воридгардида ба қонунгузории Федератсияи Русия дар самти муҳоҷирати меҳнатӣ ибрози назар кард.
Зикр гардид, ки даромадан ва баромадан, убури транзитии қаламрави Федератсияи Русия аз ҷониби шаҳрвандони Ҷумҳурии Тоҷикистон танҳо бо шиносномаи хориҷӣ ё дипломатӣ ба роҳ монда мешавад. Бинобар ин шаҳрвандоне, ки ба муҳоҷирати меҳнатӣ азм мекунанд, бояд ба бахшҳои Хадамоти муҳоҷират муроҷиат намуда, дар хусуси талаботҳо маълумоти зарурӣ гиранд. Ҳамзамон аз маҳзани ягонаи электронӣ гузаронидани шаҳодатномаҳои худ оид ба иҷозати ворид шудан ё нашуданашон ба қаламрави Русия маълумот бигиранд.