Хуҷанд: баргузории ярмаркаҳои корӣ ҷиҳати дарёфти кори муносиб

Хуҷанд, 19.05.2016. /АМИТ Ховар/. Дар майдони Регистони мавзеъи бозори Панҷшанбеи маркази шаҳри Хуҷанд  ярмаркаи вилоятии ҷойҳои корӣ баргузор гардид.
Дар ярмарка намояндагони 10 шуъбаву бахшҳои агентии мазкур аз шаҳру ноҳияҳои вилоят, чун Хуҷанд, Бобоҷон Ғафуров, Гулистон, Спитамен, Истиқлол, Ҷаббор Расулов, Бӯстон, ва КВД Маркази таълимии шаҳри Хуҷанд иштирок намуданд.
Тавре ки ба АМИТ Ховар мутахассиси Раёсати Агентии меҳнат ва шуғли аҳолии вилоят Абдурайҳон Абдураззоқов хабар дод, дар ин рӯз аз ҷониби 200 ташкилоту муасиссаи шаҳру ноҳияҳои номбаршуда 1700 ҷойи корӣ пешниҳод шуд. Музди маоши ҷойҳои кории пешниҳодгардида аз 250 сомонӣ то 1200 сомонӣ мебошад.
Дар ярмарка ба 169 нафар шаҳрванди корҷӯй, ки аз он наздики 80 нафараш занон буданд, роҳхат ба кори доимӣ дода шуда, 60 нафар шаҳрванде, ки соҳибкасб шудан мехостанд, барои касбомӯзӣ номнавис шуданд.