Картер: неруҳои ИМА дар Афғонистон барои муддати тӯлонӣ боқӣ мемонанд

Душанбе, 26.05.2016 / АМИТ «Ховар» /.  Ҳайати  неруҳои ИМА дар Афғонистон кам карда мешавад, аммо дар ин кишвар, барои муддати тӯлонӣ  боқӣ мемонад. Ин нақшаҳоро  рӯзи чоршанбе Котиби мудофиаи ИМА Эштон Картер дар ҷараёни мулоқот бо низомиёни баҳрии Амрико дар шаҳри  Нюпорт (иёлоти  Род-Айленд) таъйид кард.  Дар ин бора агентии иттилоотии «Синхуа» хабар медиҳад.
«Нақшаҳои мо  дар Афғонистон  кам кардани шумораи умумии неруҳоро дар назар доранд. Вале мо он ҷо барои муддати дароз  хоҳем  монд», — таъкид намуд сарвари Пентагон.
Ӯ бовар кунонд, ки Амрико ва муттаҳидони он оид ба  НАТО маблағгузории неруҳои амниятии Афғонистонро идома хоҳанд дод.  «Мо дорои захираҳои молиявӣ ҳастем, ки  минбаъд низ  онҳоро  таъмин менамоем. Иттифоқчиёни НАТО  равшан карданд, ки онҳо низ ба  маблағгузории неруҳои амниятии Афғонистон идома медиҳанд. Ин масъала  ниҳоят муҳим аст», — гуфт Картер.
«Ва баъдан мо дар Афғонистон барои дастгирии неруҳои амниятӣ ва гузарондани амалиёти зиддитеррористӣ хоҳем монд.», — хулоса кард вазир.