Кормандони ВКД беш аз 100 ҳазор асъори қалбакии Федератсияи Русияро мусодира карданд

Душанбе, 23.05.16. /АМИТ «Ховар»/. Дар натиҷаи гузаронидани чорабиниҳои фаврию ҷустуҷӯӣ кормандони милитсия дар ошхонаи Равшанҷон-и назди истгоҳи роҳи оҳани шаҳри Хуҷанд, зани 46-солаи сокини шаҳри Панҷакентро бо гумони тайёр кардан ё ба муомилот баровардани пул ё қоғазҳои қиматноки қалбакӣ дастгир намуданд.
Тавре ки сомонаи расмии Вазорати корҳои дохилии ҶТ хабар медиҳад, дар вақти азназаргузаронии ҳамёни дастгиршуда аз дохили он 9 адад асъори қалбакии бонки Федератсияи Русия, ҷамъ ба маблағи умумии 45 ҳазор рубли Федератсия Россия дарёфт ва мусодира карда шуд.
Ҳангоми ҳамсуҳбат шудан бо гумонбар маълум гардид, ки ӯ ин маблағҳоро соли 2015 аз Федератсияи Русия ба Ҷумҳурии Тоҷикистон овардааст.
Инчунин дар ҷараёни тафтиши пешакӣ муайян гардид, ки номбурда 2 адад купюраҳои 5 ҳазор рублии қалбакии Федератсияи Русияро бар ивази 500 сомонӣ ба зани 44-солаи сокини ноҳияи Б.Ғафуров додааст.
Номбурда ба ҳамсояаш,  марди 44-солаи сокини ш.Қайроққум, барои иваз намудани боқимонда маблағҳои қалбакии дар даст доштааш муроҷиат  намуда ва ба шахси мусоидаткунанда 50 ҳазор рубли қалбакии Федератсияи Русияро пешниҳод намудааст.
Ҷамъи маблағҳои гирифташуда- 21 адад  асъори қалбакӣ, яъне 105 ҳазор рубли Федератсияи Русияро ташкил медиҳад.
Мувофиқи маълумотномаи ташхисӣ, маблағҳои гирифташуда қалбакӣ мебошанд.
Нисбат ба далели мазкур парвандаи ҷиноятӣ оғоз гардида, тафтишот идома дорад.